«Քաղաքացիական պայմանագիր» կուսակցությունը 2017թ. խորհրդարանական ընտրություններին մասնակցելու է սեփական ցուցակով՝ առանց նախընտրական դաշինքի: Ինչպես հաղորդում են կուսակցության մամուլի ծառայությունից, համապատասխան որոշումը կայացվել է «Քաղաքացիական պայմանագրի» քաղաքական խորհրդի փետրվարի 6-ի նիստին:
««Քաղաքացիական պայմանագիր» կուսակցությունը բազմապատկելու է ջանքերը այլ ուժերի և անհատների՝ կուսակցության շարքերը ներգրավելու ուղղությամբ»,- ասված է կուսակցության հաղորդագրության մեջ:
***
Անցած շաբաթ «Քաղաքացիական պայմանագիրը» գործարկեց նոր նախագիծ` «6000 վստահված անձ» կայքը: Նախագծի նպատակն է համակարգել վստահված անձանց ներգրավումը մինչև 2017թ. խորհրդարանական ընտրություններ. նախատեսվում է 2017թ. խորհրդարանական ընտրությունների ժամանակ 1997 տեղամասերից յուրաքանչյուրում ապահովել 3 վստահված անձի ներկայություն:
Ազգային ժողովի պատգամավոր և «Քաղաքացիական պայմանագրի» հիմնադիր Նիկոլ Փաշինյանը ՍիվիլՆեթին տված հարցազրույցում նշել էր, որ Սերժ Սարգսյանի և Հանրապետական կուսակցության դեմ «խաղ կա, և հնարավոր է Հայաստանում իշխանափոխության հասնել ընտրությունների ճանապարհով»: Այս ճանապարհին Փաշինյանը կարևորել էր 2017թ. խորհրդարանական ընտրություններում 6000 դիտորդի ներգրավումը, որոնք կլինեն բոլոր ընտրատեղամասերում և կբռնեն ընտրակեղծարարի ձեռքը:
Նիկոլ Փաշինյանի հարցազրույցը ՍիվիլՆեթին` ստորև: