Եգիպտոսի դատարանը նոյեմբերի 29-ին հանել է պաշտոնանկ արված նախագահ Հոսնի Մուբարաքի դեմ հարյուրավոր ցուցարարների սպանության կազմակերպման գործով մեղադրանքը, հաղորդում է Al Jazeera-ն:
Ավելի վաղ դատարանը նաև արդարացրել է Եգիպտոսի ներքին գործերի նախկին նախարար Հաբիբ ալ Ադլին և նրա վեց օգնականներին, որոնք ևս անցնում էին հակակառավարական ցույցերի մասնակիցների մահվանը հանցակից լինելու գործով:
Մուբարաքը մեղավոր էր ճանաչվել երեք տարի առաջ, սակայն 2013-ի հունվարին դատավճիռը չեղյալ էր հայտարարվել տեխնիկական պատճառներով. դատարանը բավարարել էր երկու վկաների վերաքննիչ բողոքը:
86-ամյա Մուբարաքը մշտապես հերքել է բոլոր մեղադրանքները: Ավելի վաղ նա հայտարարել է, որ ինքը երբեք ցուցարարներին գնդակահարելու հրաման չէր արձակի: Միաժամանակ՝ նա ընդունել է, որ իր նախագահության շրջանում սխալներ է թույլ տվել:
Մուբարաքն արդարացվել է նաև Իսրայելին գազ վաճառելու գործով:
Եգիպտոսի նախկին նախագահը, սակայն, ազատ չի արձակվի, քանի որ եռամյա ազատազրկում է կրում մեկ այլ՝ կոռուպցիոն գործով: 2013-ի օգոստոսին դատարանը որոշում էր ընդունել Կահիրեի ռազմական հոսպիտալ տեղափոխելու մասին, որտեղ նա գտնվում է տնային կալանքի տակ:
Մուբարաքը դատարան էր ժամանել հիվանդանոցային շարժական մահճակալին գամված: