Կոտայքի մարզի ընդհանուր իրավասության դատարանում հոկտեմբերի 31-ին շարունակվեց դերասան Վարդան Պետրոսյանի գործով հերթական դատական նիստը:
Նիստին հարցաքննվեց վկա, ոստիկան Մկրտիչ Խուդավերդյանը: Հարցաքննության ընթացքում պարզվեց, որ վերջինս չի ստորագրել դեպքի վայրի զննության արձանագրությունը:
Դատական հաջորդ նիստը նշանակվեց նոյեմբերի 7-ին` ժամը 14:00-ին:
Վարդան Պետրոսյանն անազատության մեջ է 2013թ. նոյեմբերից՝ հոկտեմբերի 20-ին Երևան-Եղվարդ ավտոճանապարհին տեղի ունեցած ավտովթարի գործով: Վթարի հետևանքով զոհվել էին հորեղբորորդիներ Էդգար և Էդուարդ Հակոբյանները: Դերասանը մեղադրվում է ճանապարհային երթևեկության կամ տրանսպորտային միջոցների շահագործման կանոնները խախտելու մեջ, որն անզգուշությամբ առաջացրել է երկու կամ ավելի մարդու մահ: Մեղադրանքը հաստատվելու դեպքում նրան սպառնում է 4-10 տարվա ազատազրկում:
Դատական նիստի ամբողջական լուսաբանմանը կարող եք ծանոթանալ ավելի ուշ` ՍիվիլՆեթի պատրաստած տեսանյութում: