Ռուսաստանը դադար է վերցնում Ուկրաինայի պետական պարտատոմսերը գնելու հարցում, քանի դեռ այդ երկրում չի ձևավորվել նոր կառավարություն: Այս մասին հայտարարել է Ռուսաստանի ֆինանսների նախարար Անտոն Սիլուանովը, հաղորդում է ռուսական «ՌԻԱ նովոստի» գործակալությունը։ Նրա խոսքով՝ Ռուսաստանն առաջին հերթին պետք է հասկանա՝ ում հետ է պատրաստվում համագործակցել: «Մենք իսկապես քննարկել ենք նախորդ շաբաթ ուկրաինական եվրապարտատոմսերի գնման հարցը, սակայն, քանի որ իրավիճակն Ուկրաինայում կտրուկ փոխվել է, մենք պետք է հասկանանք, թե որ կառավարության հետ ենք համագործակցելու։ Մենք մտադիր ենք սպասել նոր կառավարության ձևավորմանը, հասկանալ նրա տնտեսական քաղաքականությունը»,- նշել է նախարարը։ Սիլուանովը ընդգծել է, որ իրենք արդեն ներդրումներ են կատարել Ուկրաինայի եվրապարտատոմսերում՝ նախորդ տարի գնելով $3 մլրդ-ի չափով։ Նախարարը հիշեցրել է, որ Ռուսաստանը նաև գազ է մատակարարում Ուկրաինա այն պայմանավորվածություններին համապատասխան, որոնք ունեցել է: 2013թ․ դեկտեմբերի 17-ին Ռուսաստանի և Ուկրաինայի նախագահներ Վլադիմիր Պուտինի և Վիկտոր Յանուկովիչի հանդիպումից հետո հայտարարվել էր, որ ռուսական գազի հինը Ուկրաինայի համար իջեցվում է 1/3-ով՝ $400-ից $268` 1000 խմ-ի դիմաց: Յանուկովիչի և Պուտինի հանդիպման արդյունքում պայմանավորվածություն էր ձեռք բերվել, որ Ռուսաստանը կգնի 15 մլրդ դոլարի ուկրաինական պարտատոմս: Ուկրաինայի վարչապետ Նիկոլայ Ազարովի պաշտոնաթողությունից հետո Ռուսաստանը ակնարկել էր, որ կսառեցնի պարտատոմսերի գնումը այնքան ժամանակ, քանի դեռ Ուկրաինայում չի ձևավորվել նոր կառավարություն։
↧