Ռուսաստանի նախագահին կից Մարդու իրավունքների խորհուրդը մտահոգություն է հայտնել Ռուսաստանի մալուխային հեռուստատեսության ասոցիացիայի նախագահ Յուրի Պրիպաչկինի՝ «Դոժդ» հեռուստաալիքը մալուխային հեռուստատեսության փաթեթներից բացառելու առաջարկի կապակցությամբ։ «ՌԴ նախագահին կից Մարդու իրավունքների խորհրդի՝ տեղեկատվության ազատության և լրագրողների իրավունքների հարցերով մշտական հանձնաժողովը խիստ մտահոգված է Ռուսաստանի մալուխային հեռուստատեսության ասոցիացիայի նախագահ Յուրի Պրիպաչկինի՝ «Դոժդը» մալուխային հեռուստատեսության փաթեթներից բացառելու առաջարկի կապակցությամբ»,- ասված է խորհրդի հայտարարությունում։ Հանձնաժողովի անդամները հիշեցրել են, որ գրանցված լրատվամիջոցը չի կարելի փակել՝ առանց «Ռոսկոմնադզորի» նախազգուշացումների և դատարանի որոշման։ «Դոժդ» հեռուստաալիքը սկանդալի կենտրոնում էր հայտնվել այն բանից հետո, ինչ հեռուստաալիքի կայքում անցկացվել էր հարցում՝ «Պետք չէ՞ր արդյոք հանձնել Լենինգրադը՝ փրկելու հարյուր հազարավոր մարդկանց կյանքը»։
↧